समशेरसिंह नाईक निंबाळकर यांनी दाखल केला भाजपकडून नगराध्यक्ष पदाचा उमेदवारी अर्ज : आमदार सचिन पाटील यांच्या उपस्थिती

फलटण प्रतिनिधी :

फलटण नगरपालिका निवडणुकीत आज महत्त्वाची राजकीय घडामोड घडली. भारतीय जनता पक्षाकडून समशेरसिंह नाईक निंबाळकर यांनी नगराध्यक्ष पदाचा उमेदवारी अर्ज दाखल केला. अर्ज दाखल करण्यासाठी आमदार सचिन पाटील, माजी सभापती चेतन शिंदे, माजी नगरसेवक अशोकराव जाधव, सचिन अहिवळे, हृषीराज नाईक निंबाळकर, राजेश हेंद्रे, बाळासाहेब ननावरे, बाळासाहेब कदम, समशेर यांच्या सुविद्य पत्नी सौ. मनिषा नाईक निंबाळकर, मुलगी ऐश्वर्या चिरंजीव रणवीरराजे, उपस्थित राहिल्याने भाजपच्या गोटात उत्साहाचे वातावरण दिसून आले.

फलटण शहरातून रॅलीच्या माध्यमातून समर्थकांनी घोषणाबाजी करत अर्ज दाखल केंद्रापर्यंत शक्तीप्रदर्शन केले. समशेरसिंह यांच्या पाठिशी व्यापारी वर्ग, युवक आणि शहरातील मध्यवर्ती भागातील मतदारांचा वाढता पाठिंबा असल्याने नगराध्यक्ष पदाच्या स्पर्धेत त्यांची उमेदवारी अधिक बळकट झाल्याचे स्थानिक राजकीय वर्तुळात बोलले जात आहे.

“फलटणच्या सर्वांगीण विकासासाठी, पारदर्शक कारभारासाठी आणि महिलांच्या सुरक्षेवर विशेष भर देण्यासाठी आम्ही कटिबद्ध आहोत असे यापूर्वी समशेर सिंह नाईक निंबाळकर यांनी स्पष्ट केले होते.

दुसरीकडे, भाजप कार्यकर्त्यांनी दाखवलेल्या एकजुटीमुळे आगामी नगरपालिकेची निवडणूक अधिक चुरशीची होणार असल्याचे चित्र स्पष्ट झाले आहे.