राजेंच ठरंनाच वाट पाहतोय फलटण : कार्यकर्त्यांमध्ये वाढली उत्सुकता

फलटण (प्रतिनिधी) :

विधान परिषदेचे माजी सभापती श्रीमंत रामराजे नाईक-निंबाळकर हे आगामी फलटण नगरपालिकेची निवडणूक कोणत्या पक्षातून लढवणार, याबाबत अद्याप कोणताही अधिकृत निर्णय घेतलेला नाही. त्यांचे बंधू कृषी उत्पन्न बाजार समिती चेअरमन श्रीमंत रघुनाथराजे नाईक निंबाळकर हे राष्ट्रवादी काँग्रेस शरद पवार पक्षात आहेत तर सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांनी कोणत्याही पक्षात अद्याप प्रवेश केला नाही. त्यामुळे कार्यकर्ते आणि नागरिक यांच्यात उत्सुकता आणि चर्चांना उधाण आले आहे. 

रामराजे हे गेल्या तीन दशकांपासून फलटणच्या राजकारणात प्रभावी नेतृत्व मानले जाते. मात्र यावेळी स्थानिक राजकीय समीकरणे गुंतागुंतीची बनली असून, त्यांचे बंधू रघुनाथराजे नाईक-निंबाळकर हे शरद पवार गटात सक्रीय आहेत, तर तिसरे बंधू संजीवराजे नाईक-निंबाळकर यांची भूमिका अद्याप स्पष्ट झालेली नाही. या तिघा बंधूंच्या भिन्न राजकीय संपर्कांमुळेही नगरपालिकेतील चित्र गोंधळात टाकणारे झाले आहे. 

रामराजे सभांमधून कार्यकर्त्यांना स्पष्ट सांगतात, “पक्ष कोणताही असो, मी तुमच्या सोबत आहे; पक्ष ठरवायचा पुढे बघू.” या विधानामुळे त्यांच्या समर्थकांमध्ये एक वेगळ्याच प्रकारची उमेद आणि संभ्रमाची परिस्थिती निर्माण झाली आहे. अनेकांनी नगरपालिकेच्या निवडणुकीसाठी तयारी सुरू केली असली तरी, राजेंचा अंतिम निर्णय अद्याप न झाल्याने उमेदवार निवडीवरही अनिश्चिततेचे सावट आहे.

दरम्यान, नगरपालिकेच्या निवडणुकीसाठी नामांकन फॉर्म भरण्याची प्रक्रिया उद्या १० नोव्हेंबर पासून सुरु होत आहे. अजूनही रामराजे कोणत्या पक्षाच्या चिन्हावर निवडणूक लढवतील याचा निर्णय न झाल्याने, स्थानिक राजकीय वर्तुळात “राजेंचा निर्णयच खेळ ठरवणार” अशी चर्चा रंगली आहे.

राजेंचे कार्यकर्ते आणि समर्थक मात्र ठामपणे सांगतात की,

 “पक्ष काहीही असो, आम्ही राजेंच्या सोबतच राहणार.”

यावरून स्पष्ट होते की, फलटणची निवडणूक पुन्हा एकदा राजेंच्या निर्णयाभोवती फिरणार असून, त्यांचे पुढील पाऊलच या निवडणुकीचा निर्णायक क्षण ठरणार आहे.